تاجى

اخيرا جالى تاج و زى ممتوقع جالى من الصديقة الغاليه كيكى و هجاوب على طول لانه تاج كبير
اذكر 16 صفه عن نفسك
يا نهار ابيض كتير موووت بس هحاول
1- طمووح جدا يعنى مش بحلم ابقى اهم اديب فى مصر ولا فى الوطن العربى ولا فى العالم تخيلوا بحلم ابقى اهم كاتب فى التاريخ و مش بحلم انى ابقى مدير فى شغلى او ابقى صاحب شركة ولا وزير ولا حتى رئيس جمهورية تخيلوا بحلم ابقى رئيس مملكة اتحادية بتضم العالم كله و اقدر اخلى العالم كله يعيش فى سعادة و يدخلوا الجنه كلهم طماع اوى فى احلامى بس مش على حساب حد حتى مألف حكمه بتقول الطمع الذى ليس على حساب احد فضيله بحلم و هفضل احلم و مش هبطل احلم
2- متسامح جدا يعنى مفيش اسائة او زنب مبعرفش اسامح فيه يمكن مبروحش للى زعلنى لكن لو جالى بسامح مهما كان بس لو غلطان بعتزر على طول بحب الناس و بخاف عليهم و الوحش فيهم مش بكرهه بالعكس بيصعب عليا اوى و اتمنى ربنا يهديه بس الى بحس انه مش كويس ببعد عنه منغير عتاب و منغير محسسه
3- متفائل جدا يعنى مهما حصل فى الدنيا عارف ان اليوم الجميل اكيد هييجى
4 – بحاول ابقى منظم و بقسم كل امور حياتى فى جداول و كشكول و بحاسب نفسى عليها فى عشر بنود كل يوم و كل شهر و كل سنه
5- يعنى .. رومانسى بحب الحب و كنت عايش قصه حب جميله بس ربنا موفقش بس برضه بحب و مستعد احب لاخر نقطة فى دمى
6- قنوع و ده ميتعارضش مع الطموح يعنى بحلم على قد ما اقدر بس الى ربنا بيدهولى بحبه و بفرح بيه و بشكر ربنا عليه و مبعدش اشكى و اعلق المشاكل على الظروف
7- ملتزم و مدام اتحملت مسؤليه مقدرش اتهاون فيها و مدام وعدت يبقى بروحى اوفى بوعدى
8- بحس بالناس اوى مهما كانوا مختلفين بقدر ادخل جوه الانسان و بحس بالى بيحس بيه و ده الى خلانى اتجه للادب و اكتب روايات و من كتر اتصالى بالناس معنويا ممكن الى يتالم قدامى احس بالوجع الى حس بيه كانه حصلى
9- بفرح بالتشجيع اوى و كلمه حلوه تعيشنى سنه مبسوط
10 - كفايه9 لصالحى و اخلى الباقى عيوب مع ان صعب حد يشوف عيوبه بس اهم عيب فيا انى مش اجتماعى يعنى مبحبش امارس نشاط اجتماعى كان كلام على الفاضى او زيارات و خروجات ملهاش لازمه و عندى جانب من الخصوصيه مبحبش حد يتدخل فيه و اجمل وقت بقضيه مع نفسى
11 – عصبى احيانا بس بادب و بحاول امسك نفسى على حساب اعصابى
12- مسرف اوى و مدام معايا تمن الحاجه بشتريها مع انى بقدر اتحكم فى نفسى بس فى لحظه ممكن اضيع كل حاجه مدام خدت قرار شراء
13- (16 كتير يا كيكى ربنا يسامحك) مش فاكر صراحه طيب فى حد شايف حاجه ممكن يقولى يعنى ممكن الباقيين دول لو حد شايف فيا حاجه يكتبها فى التعليقات و بعدين المفروض التجات دى الناس هيا الى تقول الصفات عن صاحب التاج محدش ينفع يتكلم عن نفسه